Bleikt og blátt

Hvaðan ætli hugmyndin um að bleikt sé stelpulitur og blátt strákalitur sé komin? Þórgunnur Oddsdóttir veltir fyrir sér þessari undarlegu tilhögun og rifjar upp að á árum áður hafi þessu einmitt verið öfugt farið: „Rauður litur þótti karlmannlegur enda tengdist hann valdi og hernaði. Það þótti því við hæfi að láta unga drengi klæðast bleiku sem var mildari útgáfa af hinum valdsamlega rauða lit. Stúlkur voru gjarnan klæddar í blátt enda hefur blái liturinn löngum verið tengdur kvenleika og sakleysi. María mey er til að mynda yfirleitt sýnd í bláum kirtli.“

Ég vil endilega vita meira um bleikt og blátt ... 

Athugasemdir

[Guðmundur Auðunsson, 27.9.2007 kl. 11:56]

Þetta er mjög athyglisverður punktur. Bleikt og blátt virðist af einhverjum ástæðum hafa skipt um hlutverk, hvort er "strákaliturinn" og hvort er "stelpuliturinn". En annars virðast þessar litareglur vera mismunandi milli landa. Af einhverjum ástæðum eru rauði liturinn álitinn stelpulitur á Íslandi.

Hér í Bretlandi þar sem ég bý er því alls ekki farið, reyndar virðist rauður frekar vera "strákalitur" heldur en "stelpulitur". Ef maður labbar inn í barnadeild H&M þá sér maður vissulega mismunandi svæði fyrir stráka og stelpur. Strákamegin eru "skærir" litir, eins og rauður, appelsínugulur og svo auðvitað blár, grænn og mosagrænn sem eru ekki endilega skærir. Stelpumegin eru síðan "pastel" litir, eins og bleikur, fjólublár, ljósgrænn, ljósgulur o.sv.fr. Stelpumegin finnast líka rauðar og grænar flíkur, en þær rauðu eru meira áberandi strákamegin. Ég er persónulega mjög hrifinn af rauða litnum (síður þeim bleika) og klæði strákana mína of í rauð föt. Því var ég mjög hissa þegar menn minntust á þetta heima og sögðu að ég væri djarfur að klæða strákana í rautt!